“Уран зохиолын боловсрол төв” нь олон нийтийн уран зохиолын мэдлэг, боловсолыг дэмжихэд чиглэгдэн 2018 онд байгуулагдсан төрийн бус байгууллага юм. Манай төв нь байгуулагдсан цагаасаа хойш уран зохиол сонирхогчид, зохиолчдод зориулсан “Бүтээлчээр туурвихуйн 10 үндсэн ойлголт” Бямба гаргийн сургалтыг МЗЭ-тэй хамтран жилд хоёр удаа зохион байгуулж байгаа бөгөөд одоогоор энэхүү сургалтад 150 орчим хүн хамрагдан уран зохиолын туурвилзүйн онолын мэдлэгийг зохих төвшинд эзэмшээд байна. Үүний зэрэгцээ жилд 5 хүртэл хүн ганцаарчилсан сургалтад хамрагдан өөрийн бичиж, туурвиж буй зохиол бүтээлдээ мэргэжлийн зөвлөх үйлчилгээг авдаг болоод байгаа болно. Мөн манай төв нь үндэсний уран зохиолын түүхэн тойм хоёр боть номыг Соёлын яамны дэмжлэгтэйгээр хэвлэн нийтийн хүртээл болгосон нь уншигчдын талархлыг багагүй хүлээсэн юм. Түүнчлэн орон нутагт ажиллаж амьдарч буй уран зохиол сонирхогчид, уншигчдад зориулсан лекц сургалтыг Дархан-Уул, Орхон, Булган, Өмнөговь аймгийн уран зохиолын багш нар, зохиолч уншигчдад зориулан хийсэн нь багагүй амжилт олсон билээ. Ялангуяа манай төвөөс уншигчдын боловсрол, мэдлэгийг дэмжихэд зориулан хийдэг,

“Шүүн тунгаах сэтгэлгээг уран зохиолын орчинд хэвшүүлэх нь”,

“Шүүмжийн орчин үеийн хэв маягууд”

“Үндэсний уран зохиолын сэтгэлгээний хөгжлийн үе шатууд”

“Дүрслэн өгүүлэхүйн хувьслууд” зэрэг лекцүүд уран зохиол сонирхогчдын талархалыг багагүй хүлээсэн болно.

Цаашдаа бид олон нийтийн уран зохиолын боловсролыг дэмжихэд чиглэсэн ном товхимол эрхлэн гаргах, лекц, сургалт зохион байгуулах ажлуудыг тогтвортойгоор хийж, хэрэгжүүлэхийг эрхэмлэн ажиллаж байна.